Воскресенье/Гьат1ан, 24.09.2017, 17:01
Ассалам Г1алайкум Гость | RSS

САйт учителя аварского языка Аксират Ахмедовой

[ Новые сообщения · Участники · Правила форума · Поиск · RSS ]
Страница 1 из 11
Форум » Годекан » Тема для общения и знакомства » Куч1дул (.......)
Куч1дул
weux Оффлайн · 15.03.2014 в 20:24
weux

Дир цlолбол гъотlода гъабу бан буго
Балагьун гlорцlулеб берцинлъи гьечlо
Гьалъий хъулухъалъе барахщулареб
Щаяли лъаларо дун чlухlунвуго

Чанго соналъ цебе, цадахъ дун вачун
Рагьда кlудадаца хурхинабуна
Гьанже гьелъул тlагlам, гlодор чlун цадахъ
Кинабго хъизаналъ буго босулеб.

Бацlадаб лъимги тlун къойил лъалъала
Лъидаго рагlичlеб маргьу бицуна
Цlолбол гъотlолгун дир бугеб гьудуллъи
Лъала цохlого цо дир кlудада
weux Оффлайн · 15.03.2014 в 20:29
weux

Гьаюраб къо  муг1алималда барки.

Гьаб октябралъул  роц1араб къоялъ,       
Изну кье баркизе  мун гьаюраб къо.
Гьаризе халатаб  талих1аб г1умру,
Гьабулеб  ищалъулъ г1акълу, ц1одорлъи.     

 Дур рокъоб кидаго  талих1 бук1аги,                                                                                                                           
Дур рек1елъ кидаго  рохел кунч1аги,
Лъималаздаса мун  йохун хут1аги,
Гьезул гьит1ичаз  мун рази гьаеги. 

Баракат дур  рокъоб г1орлъун  чвахаги,
Къварилъи азбар тун,къват1иб хут1аги,
Лъик1ав гурев  гьобол рокъов  къагеги,
Къвариг1ел гьеч1ев  чи  аск1осан  аги.
weux Оффлайн · 15.03.2014 в 20:37
weux

Рокьул тlегь

Бищунго борхатаб кьурул рагlалда
Рокьул тlегь рагlула тlезе щолареб,
Гьеб кодоб щварасул керен бухlараб,
Хlасратаб рокьуе нухги битlулеб. 

Гьаб кlодол маргьуйищ, яги уябищ?
Щивгlаги чи гьечlо тlегь тlун босарав.
Тlубачlеб рокьуца керен бухlарал
Кир ралагьаниги ратизе руго. 

 Бицинищха дуйго черх сородулеб,
Хилиплъи лъалареб рокьул хlакъикъат?
Къураб можоро щун рокьи тlубачlев,
Гlолилас жиндийго босараб къисмат. 

 Йокьулей щвечlогодунял бецlлъарав,
Мурад тlубачlого гlумру рихарав,
Гlаданирберазул магlубакъварав,
Къуват чорхъолъа ун чара бухlарав. 

 Чанай вахъунаго хъурмица ккурав,
Лъукъун хутичlого тlуванго чlварав,
Чlван хвечlеб рокьуе сабаб балагьун,
Тlогьоде хьул лъурав магlаруласул. 

 Къаси тlогьол лъайдал макьу билана,
Анищаца мехтун сапар бухьана,
Хьихьарай бабахъа изну босичеб,
Сапаралде радал къватlив вахъана.  

Доле, доб гlасияб,бицен гlемераб,
Рещтlен цlудул гуреб жеги лъалареб,
Ццин бахъун балагьун, тушман кинигин,
Гlолиласде буссун борхатаб кьуру. 

 Кье, АЛЛАГЬ, гьасий рухl, рухlбахъун вугин,
Рухlгlан йокьаралъе, рокьул бицине,
Гурхlа,мун бетlергьан, бетlер сверараб,
Сабру хвараб унтуй сабаб батизе.

 Жиндир чорхолъ бугеб рухlги бакlарун,
Букlараб къуваталъ тlаде харана,
Чвахъулеб гlеталъул бадир гирулел,
Гарал гьасда гьанже лъалел рукlинчlо. 

    Гьале цlудул бусен, гьалъий ургъел щиб?
Щваралъуб боржине куркьбал ругелъул.
Йокьаралда цохlо бер кlутlизелъун,
Кlолевани гьасда гьанже воржине. 

 Гьорол карачеллъун, цlадал къатlралъун,
Къазе щолеванищ цоцlул аскlове,
Чlегlерал беразул кунчlи бихьизе,
Кинабго кьелаан барахщичlого. 

 Батичlо тlокlаб рес, гьале кьурул сиртl,
Сородулеб черхалъ нахъа тараб нух,
Чара лъугlулаго,гlетl чвахъулаго,
Рагlалде тlамуна ахираб гали.  

Ганчlилъ кьибил биччан кьурулъ бижараб,
Рокьи тlубалеб тlегь кодоб босана,
Каранде гьебги къан йокьулелъул цlар,
Кьурабалъ багъизе ахlун биччана.  

Огь, гьаб лахlзаталда щиб бащалъулеб?
Щванищ мурадалде мун, магlарулав?
Дур гьаракьги рагlун доба рикlкlада,
Рекlелъе хlунсана дур гьудулалъул.  

Дагьайги лъалхъун гьей гlодой йортана,
Вортун гьелда аскlов росги вачlана.
Бечlана кодоб тlегь тlун бахъиналде,
Тlун хlатикь гамачlгун вас вортун ана. 

 Унев вуго воржун, гьале цlум гlадин,
Гьаваязда хlинчlгlан вуго тlадагьго,
Тlубанаха гьанже гьалагаб рокьи,
Рухlал зодир руго, черх кьурукь буго…
weux Оффлайн · 15.03.2014 в 20:52
weux

Авар мац1алъул КВНалде х1адурун бук1араб кеч1.

Дуниял бохулеб их щолеб г1ужалъ
Ниж г1едег1ун руго КВНалде,
Кинабго разияб г1одор ч1еялде
Г1емер х1адурлъана, ниж Агъадисел

 Ассаламу г1алайкум КВН цоял,
Нужейги рорч1ами х1урматаб жюри,
Жакъа, гьаб къецалде къач1ан рач1арал
Ниж Агъадисезул урхъараб салам!  

Хошгелди муг1алимал,
Г1елму ниже кьурал,
Маг1арул миллат ц1унун
Мац1 нилъеда малъулел. 

Салам нужей Бирисел
Баракатаб жамаг1ат
Жах1да- х1усули гьеч1ел
Гьобол- гьудул хириял. 

Мугъ ч1варал мадугьаллъи
Лъик1 щварал Гьонодисел
Къадруял умумузул
Ирс ц1унарал ирсилал.   

Т1олабго нилъ цолъун мац1 ц1унизелъун,
Ц1акъго т1адег1анаб рак1ари нилъер.
Тирилъи- лъай т1ок1ал т1атинарулел
Гьудуллъи бергьунеб горсвери нилъер. 

Рахьдалаб мац1алъул маг1на к1очани
Маг1арулалилан кинан абилеб?
Адабияталъул тарих лъуг1ани
Лъуг1иларищ миллат маг1арулазул.
weux Оффлайн · 11.03.2016 в 23:00
weux

Церекъад т1аделъун эмен вук1ана,
Дуй хизан гьабизе заман щванилан.
Нолъкъасиги яч1ун эбелги ч1ана,
Хехго цо ясалъул ц1ар абейилан.

К1удияв вацасул даг1ба лъуг1ич1о,
Хъамунги теларин, йихьизаеян.
Т1алго г1агарлъидал ваг1заби руго,
Хехго херлъилалде рукъде вуссаян.

Ясални ракьалда ракь г1адин руго,
Бокьарай ячине ресалги руго.
Амма щибаб х1алт1и гьабилелде цин,
Г1одов ч1ун ургъани лъик1аб бук1уна.

Хизан гьабияли ц1акъ бигьаяб иш
Щибизе гьеяли бич1ч1улеб гьеч1о.
Рокъоса сих1къот1и хвезабизейищ?
Кидаго дунгогун даг1басдизейищ?

Посуда чуризе чи х1ажат гьеч1о,
Чарал кутул руго гъудрул ч1ик1к1изе.
Гурдида итуги, студент вук1индал,
Ясаздасаги лъик1 дидаго лъалеб.

Жаниб ханжу бани чед къват1иб кьолеб,
Щуазаргоги кьун босараб комбайн.
Рет1ел-хьит чуризе квер х1алт1уларо,
Кинабго гьабула гьаб машинаца.

Кофе-чай бокьани кофеваркаги
Компотал рокьани «выжималкаги».
Х1айван гьеч1ониги «Кубань» т1орахьги
Кидаго камич1о гьаб дир рокъоса.
weux Оффлайн · 22.03.2016 в 18:29
weux

Къаси Мух1амадил хабар бач1ана
Хехго к1оч1ол раг1и дица ургъеян.
Жиндир бакъаналда рекъон кколедухъ
Рокьул куплетазул сарин гьабеян,

Гьелдаса зах1матаб т1аде ккогеян
Дунги къалмидехъун хехго вортана.
Алфазал багьаял, багьа хириял
Маг1арул хинк1алде хъвана саринал.

Ма, гьанже босеян, ч1ух1дарулаго
Ана гьел раг1аби Мух1амадихъе.
Мух1амад вохула данд хъатал кьабун:
"Хинк1иделъ гуро, ле! Ясазде хъвай",-ян.

Я вацха, Мух1амад, дун поэт гуро
Гьедин бокьараб кеч1 камилго хъвазе.
Гьединаб рокьидул хъвазе кканани
Гьеб щиб жояли цин лъазеги ккола.

Иллагьи бегараб, бадиб ц1а лъурал
Хъвалищ цо шиг1раби муг1рул иццуде?
Муи к1оч1он толел, рак1 гьалаглъулел
Гьарилищ куплетал гох1ал-щобазде?

Ясал к1оч1он толеб, валавитунеб
Авар каламалделъ рехилищ ч1орал?
Росуги рехун тун, шагьар мерхьунев
Мун рокъде вуссунеб гьабилищ цо кеч1?)))
weux Оффлайн · 22.03.2016 в 18:30
weux

Адабият
Сабураб инсул рукъ, гъансит1охъ кунч1и
Киниде къуларай х1еренай эбел
Умумузул бицен, кици, абиял.
Кагътиде босараб меседил щакъи.

Миллаталъул тарих, халкъалъул гьунар
Пандрида ах1арал машгьурал куч1дул
Чирахъул канлъухъе, маг1арул мац1алъ
Г1уц1ана нилъее гьаб Адабият.

Цинги хадур рач1ун мун г1адал чаг1аз,
Цебе ккараб х1алалъ хъвазе лъугьана.
Вконтактал, фейсбукал, вацапал гьарун,
Гьорой биччан ана дир маг1арул мац1.
Форум » Годекан » Тема для общения и знакомства » Куч1дул (.......)
Страница 1 из 11
Поиск:


Ахмедова Аксират © 2017