Хамиз/Четверг, 19.10.2017, 17:22
Ассалам Г1алайкум Гость | RSS

САйт учителя аварского языка Аксират Ахмедовой

Сайталда руго:

Киналниги сайталда руго: 1
Гьобол: 1
Сайталъул г1ахьалчи: 0
Block title

Каталог статей

Главная » Статьи » Мои статьи

К1к1уяда росдал тарих. 34 гьумер.

К1к1уяда росдал тарих. 
34 гьумер.

Дун гьит1инаб мехалъ росдал харабаз бицунаан гьаб хабар. Гьанже хут1ун гьеч1о гьеб лъалел. 1920 сон.
Большевикал рач1унел ругин росулъе абураб хабар т1обит1ана. К1к1уяда росдал жамаг1ат к1ийиде бикьана гьеб хабаралъ. Бакъулаз х1укму гьабуна большевиказул цевехъан Хара Хараевасухъеги ун, гьезулгун хабар данде ккезабун, рекъел гьабизе. Ва гьедин гьабуна.
Агъадасезул жамаг1ат гьелда разилъич1о. Гьезул пикру ккана большевиказе дандеч1ей гьабизе, ай гьезда гъоркьччел гьабизе. 125 чи вахъун ч1анила Г1урт1а(Г1улла) маг1арда. Доб заманалда, шагьра-нухги бук1инч1ого, К1к1уяда росулъе гьакил нух бук1анила Г1урт1асан. Гьанжеги буго гьеб нух гьоко бачунеб х1ал хут1ун гьеч1ониги, нух бук1араблъи лъалеб х1алалда.
125 чи кваназеги кколелъул, агъадисезул жамаг1аталъ гьезие ч1езабулаанила квен-т1ехги цоги къвариг1арабги. Бицен батана Чарандал Г1али абулев Г1вала кулохъа чиясул. Цо нухъалъ оц бач1анила рагъухъабазе хъвезе бачун Г1урт1е жамаг1аталъ. Гьеб г1олохъабаз хъванила ва гьан рагъухъабазе бикьанила. Нахъе хут1анила оцол бет1ер. Гьеб лъие кьелебни х1исаб гьабулаго, цояс махсародего абунила, гьеб бихизе к1варасе тезе ккелин.
Нус бач1ого, оцол ч1ук1к1ич1еб бет1ер бихизеян г1емераз х1ал бихьанила, бажарулеб бук1инч1ила. Цинги Чарандал Г1алица х1ал банила. Кагъат г1адин биханила гьес оцол бет1ер. 
Гьедин моц1г1ан заман банила гьаз Г1урт1а. Большевикал Къорода росдал раг1алда раккун рихьанила. Гьезул къокъа (300 чи) К1к1уядехун сапар бухьун рач1унел рук1анила. Гъоркьч1ел батиялда щаклъиго гьеч1ого. Г1урт1а хьондаса т1аде рач1унаго агъадисезул рагъухъабаз байбихьанила т1аде к1удиял ганч1ал гиризаризе гьезде. Цо алхинч1ого реч1улеб бук1анила туманк1. Гьезул рагъ бихьидал большевиказ мугъ реханила ва т1уризе лъугьанила. 
Гьегунаца(мунагьал чураяс) бицараб: Большевикал т1урулаго, нилъер рагъухъаби гьезда хадур рекеранила, Мизачи абулев чияс, доб цересан ц1олел туманк1азда гулла т1амизе заман балеб бук1ун, нахъ векерун, т1урун унел большевиказда нахъасан бот1ролъ гъунтагъ кьабун анкьгояв ч1ван раг1улин.

Анна заман. Большевикал рач1ана нахъойги, гьанжесал солдатги г1емер вук1ана гьезул, г1арадабиги рук1ана. Бириб къварилъухъа бараб г1арадаялъул гулла гьанжеги батула цо-цо Г1урт1а ракьулъ къан, кьвагьич1ого хут1араб. Гьеб рагъулъ к1удиял камелал ккана агъадисезул. Хут1арал росулъе т1ад руссана. Г1урт1аса гьел нахъе инаризе к1ведал большевикал рагьана Г1урт1е. Гьенисаги банила г1арада росдаде т1аде. Гьедин кьвагьич1ого хут1арал г1емер рук1ана росулъ, бат1и-бат1иял къебеллъухъ, устарзабаз жаниса г1инт1ахерги бахъун х1алт1изарулел г1арададул гуллби. 
Расулил Г1айишатица( мунагьал чураялъ) бицунаан, жал гьанже ругеб бак1алде бук1анила басрияб рукъ, жаниб халатаб цагъурги бугеб. Гьеб рокъоса киналго бихьинал Г1урт1а рагъулъ ч1ван рук1анила. Нахъе хут1арай к1одо йик1ун йиго большевиказукьа цагъуралда нахъа яхчун. Гьезда гьей ятун йиго. Ятаралъуй гьенийго туманк1ги реч1ун ч1ван йиго. Г1емер заман индал г1адамазда гьенийго ятун йиго, гьел вах1щиял шайт1абаз ч1ван рехун тарай пакъир.
Гьеб нухалда жамаг1аталъ х1укму гьабун буго росу тун къват1ире рахъине, къеркьезе г1адамалги ярагъги ц1ик1к1иналъ большевиказул.
Гьел анила Чарахъ абураб, К1к1уядасизел гьединаб х1асил ккани инеян бук1араб, росулъе. Чарахъ ургъун руго хадуб кин гьабундай лъик1ан. Жиндир баракат нилъее камугеяв, къурбанчилазул кьибилалъул, росдал дибирлъун вук1арав Зангал Г1алица абунила жив инин Хара Хараевасухъе. Гьесда цадахъ лъабгойги г1олохъанчиги анила. Зангал Г1али вук1ана г1арабги, г1урусги мац1ал лъалев чи. Шамалдаса г1алимзабаз рач1унаанила гьесухъе г1арабалъ хъварал кагътал г1акълу дандбазе. Хараевасулги Г1алилги хабар цойиде бач1анила, ва жамаг1аталъе ихтияр кьунила росулъе т1адруссине. Амма гьел росулъе щведал лъилниги рокъоб гъуд-г1уч1г1анасеб т1аг1ел батич1ин буцунаан. Кинабго бикъун ун, ч1орогоял рукъзал гурони рат1ич1ила.

Категория: Мои статьи | Добавил: weux (21.03.2016)
Просмотров: 91 | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]
Вход на сайт
Балагьизе

Ахмедова Аксират © 2017