Воскресенье/Гьат1ан, 24.09.2017, 17:08
Ассалам Г1алайкум Гость | RSS

САйт учителя аварского языка Аксират Ахмедовой

Сайталда руго:

Киналниги сайталда руго: 1
Гьобол: 1
Сайталъул г1ахьалчи: 0
Block title

Каталог статей

Главная » Статьи » Мои статьи

Жамаг1аталъул газа...

Жамаг1аталъул газа кьурдаги...

К1к1уяда росу бикьула лъабго бут1аялде(Агъада, Кьогъоб, Г1урала), лъабго школаги буго, щибаб бут1аялда ругел г1адамазул г1амал-хасиятцин буго бат1и-бат1ияб, цо росулъа чийищ гьалин ккела лъаларезда. Амма т1аде къо бач1ани киналго цолъула цо рокъоса чи г1адин. Росу г1уц1ун буго 77 кули данделъун. Росулъе ругел нухал рук1ана квешаб унтилъун кидаго. Мух1амадкамилица (Аллагь жиндаги наслабаздаги гурх1аяв) гьеб иш хисизабуна росдае лъик1аб рахъалдехун. Г1арцул рахъалъ ва х1алт1улеб техникаялъул рахъал х1ажатабги ч1езабун, гьесул вац Къурбайлас нухмалъиги гьабун росулъе бугеб нухда асфальт лъуна. Гьанже бокьарав балагьизе бегьула, тахшагьаралда ругездасацин лъик1ал нухал руго. Амма росулъ жаниб асфальт т1езе рес ккеч1о, щай гурелъул, масала Агъаделъ бугеб нух толаро лъараца цадахъ Каспий х1оралде босун. Киналго агъадисезул нухал гьанже мореялъул т1инда ратизе руго. Картаялда "речка Куядинка" абун бихьизабун буго нижер лъар, нижецаго К1удияб гьар абула. куядинка щай хъварабниги лъаларо, речка куядинец хъвач1ого, гьалъуб ц1олъиялъул г1аламатал картографазда рихьараб къаг1ида, г1умру росулъ араздацин рихьмч1ел. Бат1аго к1удияб гьеб гьеч1о, к1одолъула гьеб ц1ад бан хадуб. Цо нухалъ лъар рек1ун цебе бахъизабизе к1веч1еб автобусцин ана гъобго Каспиялде босун. Г1ажаибго к1одолъун ва гьалаглъун бач1уна ц1ад бан хадуб гьеб гьит1инабго лъар, гьелда цебе батуларо щибго. Цебе батараб, жамаг1аталъул х1ама-бече бук1а, цогидаб бук1а, кинабго шагьаралде уна босун. Г1адамал шагьаралде гочиналда г1айиб щиб, х1айваналгун машинабицин унел руго нижер гьенире. Лъараца хвезабунщинахъе нух къач1алел, рачлихъе щвезег1ан х1арщулги ц1ун, жамаг1атги бук1унаан.
Гьедин бук1ана исана сон щвезег1ан. Росдал администрациягун жамг1ияб данделъиялда гьеб лъаралдаса цебе кьо лъезе х1укму гьабуна. Гьеб х1алт1и т1аде босана жамг1ияв х1аракатчи Ах1мадханов Г1умарасх1абицаги Г1алиев Лабазаницаги. Росдал администрациялъги, жамаг1аталъул щибав чиясги бажарарас бажарараб кумек гьабун гьанже раг1алде бахъунеб буго гьеб лъик1аб иш. ИншаАллагь бахъагиха. 
Кутакалда гьаб агъадисезул жамаг1аталда рак1 рекъола дир. Щиб гьабулеб бугониги цолъула. Цо дунг1адав ц1одорав чиясда нахъ рилълъуна. Ц1одорав щвеч1они г1адалавги дун г1адав вокьула гьазие. Гьедин кидаго цолъун, рекъон х1алт1ун нижеца ц1унана росу вагьабизмадасаги, бюрократизмаялдасаги, коммунизмалдасаги. Лъуг1изабуна росулъ г1адамал мехтизарулеб лъамалъаби ричулел тукаби. Гьекъолел чи гьанже г1арац кьун ралагьаниги ратуларо росулъ. Лъаларо дикьа бахчун бугищали гьедин иш, батаниги гьебги якъинлъарабго лъуг1изабила нижеца. Муг1алимзабаз "взятка" босулин цо-цо шагьаралъулаз бицунаго г1ажаиблъула, киндай гьеб бук1унеб? Росулъ лъабго школа буго, жеги ккеч1о цониги муг1алимасухъа гьединаб къабих1аб иш. Дида лъала анлъго моц1алъ харжги кьеч1ого рук1аниги, цониги муг1алим х1алт1уде вахъинч1ого ч1еч1о. Ц1ик1к1араб к1вар кьола муг1алимзабазги умумузги тарбиялъулаб рахъ ц1ик1к1инабизе лъималазул. Школазда гьеч1о цониги сигарет ц1алев ц1алдохъан. Цониги ц1алдохъан гьеч1о милициялъул х1алихьатал лъималазул хъвай-хъваг1аялда гъорлъ. 35 сон росулъ баниги жеги вихьич1о цо къоялъг1аги жиндаса к1удиясде данде к1алъалев. К1удияв т1аде щвани, т1аде рахъун бак1 кьола. Нухда данде ккани адаб ц1унун к1алъала. Мадугьалихъ кумек х1ажалъани, хобалаздаса хваралцин рач1уна кумекалде, ч1агоязул бицинего бицинаро.
МашаАллагь, гьадинаб щущараб росулъ, гьадинаб гъункараб жамаг1ат бижи буго унго-унгояб Аллагьул х1алк1вей.
Дун ч1ух1ула дирго жамаг1аталдаса. Нухда ватарав лъимада цо щиб бук1аниги къвариг1елалъ вит1изеян абуни, бицун лъуг1иналде къвариг1елги т1убан т1ад вуссуна, х1алч1ахъадал.
ИншаАллагь, хадубги лъик1лъун гурого квешлъугегиха. 
Х1утниса Шамил, дуг1а гьабе цо, кинабго хъвараб рекъон кколеб.
Амин!.

Категория: Мои статьи | Добавил: weux (09.04.2016)
Просмотров: 107 | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]
Вход на сайт
Балагьизе

Ахмедова Аксират © 2017