Суббота/Шамат, 16.12.2017, 06:09
Ассалам Г1алайкум Гость | RSS

САйт учителя аварского языка Аксират Ахмедовой

Сайталда руго:

Киналниги сайталда руго: 1
Гьобол: 1
Сайталъул г1ахьалчи: 0
Block title

Каталог статей

Главная » Статьи » Мои статьи

Ц1одораб бот1ролъе г1адалаб пикру. Г1адалаб бот1ролъе ц1одораб пикру. Кинго цо гьоркьоб бак1 батулеб гьеч1о...

Ц1одораб бот1ролъе г1адалаб пикру. 
Г1адалаб бот1ролъе ц1одораб пикру.
Кинго цо гьоркьоб бак1 батулеб гьеч1о...

Вач1уневги уневги ригь бук1унаро гьав Шамилил. Дун радалго х1алт1уде ине ккола, дие рес бук1унаро сордо бащалъизег1ан гьавгун харбида вук1ине. Мугъ берцин гьабеян абизе рекъонги гьеч1о, абич1ого ине гьасдаги рак1алдаго гьеч1о. Жакъаги вач1ана дихъе, жиндир баракат халкъалъе камугеяв, нагагь баракат щвеч1они заралг1аги халкъалъе ккогеяв Х1утниса Шамил. Басрияб ва ц1ияб абураб пикруялда т1асан буго жакъа гьесул бицунеб кинабго. Гьал цо-цо ругила рахъинобго рахъги бан, басриябги ккун ч1ун, ц1ияб бегьуларин ах1и балеб. Г1ор дуда нахъ буссинабизе к1олеб гьеч1они, гьелда цадахъ ине кколилан буго асул бицунеб жо.
Кьижизе бокьарав дунги, щиб гьас бицаниги "Уха, Шамил, бит1араб буго!" бачунев вуго. Хабар халалъунеб буго. 
Нуц1ида к1ут1улеб сас бахъана. Огь, талих1ан рак1алде ккана. Гьав рокъове вачине нахъ вач1арав чи гуродайян рак1алда бук1ана...
Шамилица бицунеб кинабго мекъаб буго. Бегьуларо нилъее щибниги ц1ияб. Басриялда т1ад кьанги бан рук1ине ккола. Ц1иялда яшав гьабизеян лъугьаниги, нилъеца гьабула т1убанго г1акса. Жеги ц1ияб босулеб даражаялдего щун гьеч1о нилъ.
Рак1алде щвана цо нухалъ Авар Мух1амадги дунги ащбазалда г1адор ч1ун г1ат1ал хинк1азе патих1а бачунел рук1ана. Мух1амадил ругоан лъик1ал пикраби. Гьесие бокьун бугоан авар мац1алда телевидение гьабизе, авар мац1алъул газетги бахъизе, ва хасгьабун авар мац1алъул муг1алимзабазе сайтги г1уц1изе. Гьез жидерго бугебщинаб х1албихьи лъела гьеб сайталда, цинги цогидазе рес бук1ина гьеб гьенисаги босун жидерго дарсаздаги х1алт1изабизеян абуна Мух1амадица.
Дица Мух1амадие жаваб кьуна, г1адада дурго заманги хвараб, г1арацги хвараб, нервабазулги чурпа-карщ лъугьараб х1алт1и кколаха гьелъулин. Щай гурелъул, дуда рак1алда буго, щивав муг1алимас г1ахьаллъи гьабилин, щивас жиндирго методикияб материал сайталда лъелин, гьебги цебет1елин. Амма лъоларо! Лъолел рук1ина к1игогун бащдав муг1алим, хут1арал лъураб сайталдаса бахъулел рук1ина. Кидаго садакъа кьолеб цого квер, Садакъа босе бокьараб азарго квер. Рокъоса кьеян абуни г1адамасда спичкадул г1уч1цин бак1лъула, рокъобе босеян абуни рукъг1адаб жоги босула. Г1емерисезе жидерго жо г1адамазухъе кьеялдаса хвелго бокьула.
Мун мекъи вугин абуна дида Мух1амадица, йохъ гьединал чи гьеч1ила маг1арулал, гьез цоял-цоязе кумек гьабиларищилаха.
Баркала щолареб, киригицин бук1инищали лъалареб х1алт1и ккола гьелъул, Мух1амад, гьебги тун рач1а к1иявго даран-базаралде, гьанже модный раг1и "бизнесалда" разеян абуна. 
Гьав дихъ г1енек1кич1о.
Гьас гьабун бугин бицунеб раг1ана доб авар ТВги, газетаги, лъаларохъа чан экземпляр гьеб газеталъул г1адамазухъе щолеб ва ц1алулебни. Доб "Х1акъикъат"-го г1адин зулму-х1ал гьабун муг1алимзабазул харжалдаса кепкалги нахъе росун х1алица хъвазе гьабулебни, ялъуни унгоги жамаг1аталъе бокьун жидецаго босулеб, ц1алулеб бугебни. Диеги рач1уна гьел "Х1акъикъат", кидаго к1ват1ун, дица мадугьаласе кьола хъалиян кьуризе кагъат бук1ине. Щай гурелъул ц1алараб мехалда гьадингояб ч1андаялде буссун буго. Т1убараб газета бегидал бищун ц1ик1к1араб цо макъала батани ц1ализе мустах1икъаб, гьебги к1удияб мадар. Гьанже гьабулеб бит1ун ккаги Мух1амадил. Ккеч1они ккезабизе нилъецаги х1аракат бахъилаха.
(гьаб скобкабазда жаниб хъвараб нилъеего хъвалеб жо буго, гьаб г1адамазда бицине бегьуларо. Лъиц1а щиб бицаниги, кин дица каканиги, гьав Мух1амадил жаниса бет1ер лъик1аб буго. Ц1одарал ва пайдаял пикраби рач1уна гьасул бот1ролъе. Амма нилъерго Черномырдиница гурищха абураб "Хотели как лучше, а получилось как всегда",-ян).
...Дун т1аде вахъана нуц1ида к1ут1улев щив вугояли балагьизе. Нуц1ил г1оркьалде квер бегьана, нуц1а дандего рич1ун бач1ана...
Гьаб "Гъуниб" газета бахъулев бет1ерав редактор нилъеда киназдаго лъалаха. Мух1амад Къебедов, Къорода росулъа, умумузулго ватарав гьобол, нилъерги гьудул. Гьасде буго дир г1арз, гьаб "Гъуниб" газет бахъулеб кагъат буго сог1аб, хъалиялъе х1алт1изабизе пайда гьеч1еб тайпаялъул. Хъалияналдеги х1алт1изабизе бегьуге, гьалдаса босилеб пайда щиб? Цо бугебги нилъерго районалъул газетадул къиматги гьабизе ккеларищ дицаги, дуцаги, хъалиянчи мадугьаласги? Мух1амад Аварскийгун г1одов ч1ун вук1арав ащбазалде ккана Къебедовгун цадахъги. Росана гьанжеги г1ат1ал хинк1алги бетараб рахьдал шишаги. Цинги вугоха Къебедов бицун вахъунев, гьаб газет х1ажат бугила хисизабизе. исанаги довго ахиханас хуриб гъвет1 ч1ана, довго хуруханас рохьоб бац1 ч1вана гуреб, бат1ияб пикруялде бачине. Бит1араб бугоха, х1аким кьаниги гьеб беццун макъалаби хъвай халкъалдаги ч1алг1уна. 
Дун Мух1амадил пикруялда т1ад рекъола. Бит1араб буго. Басриябги тун ц1иялда яшав гьабизе заман щун буго. Кинха гьеб ц1и гьабилеб? Цох1о Къебедовас гирулеб гамач1 гуро гьеб. Газет ц1и гьабизе ккани, х1ажалъула ц1иял хъвадарулел чиги, гьенире макъалаби рит1улел. Дун г1адинал гуроха, дагьал гьунар-махщел ц1ик1к1арал. Гъуниб районалда гьединал г1унги т1ок1 ратила. Амма к1ух1аллъи абулеб унти ккун бугоха халкъалда. Дие щай абураб пикру буго сундулъго киназулго. Гьеб нилъер киназулго масъала ккола. Районалъул газета цик1к1араб даражаялде бахъинаби буго аслияб масъала кинабго жамаг1аталъул. Гьеч1ого газетагун рук1ине ругоха г1абдалзаби г1адин, киналго районазда бугеб нилъер гьеч1ого? Исана азарго экземпляр хъван батани, гьанжеялдаса гьеб анц1азарго хъвазе ккола.
(гьаб скобкабазда жаниб хъвараб нилъедаго гьоркьоб бицунеб хабар буго, цогидазда лъазе бегьулареб. Бит1ахъе бицани гьанжеги бат1аго квешаб газета гьеч1о нилъер. Цо дагьабго хисизабуни халкъалъулги бербалагьи гьелдехун ц1ик1к1ина. Маг1ишат пунц1езабун ц1алдизего рег1улареб жамаг1аталъги ц1ализе байбихьизе бегьула гьебги, цогидал авар мац1алъул, къойидаса-къойиде ц1алулезул къадар дагьлъулел ругел, газеталги. Мух1амад вуго г1емер х1албихьарав, гьунар-махщел ц1убарав журналистги редакторги. Дунги мунги г1адал нухлул байбихьудаго ругел чияз даг1ба балев чиги гуро гьев. Амма цо лъилъниги даг1ба бач1агоги кинха телеб?)
Дун вуго кутакалда жамаг1аталъе вокьулев чи, машааллагь гьазе дир хиралъи. Амма дир пикру бук1уна, анц1гоялда гъорлъ цо ц1одораб кканиги, ц1акъ сог1аб. Жамаг1аталда бич1ч1изе зах1матаб. Дица хъвараб анц1гояс ц1алани, лъабгоясда бич1ч1ула. Хут1арав анкьгояс рогьалидаго ун дир ахилъе гамач1 бан батула.
Гьанжелъизег1ан хъвараб гьаб кинабго буго ч1анда, ц1алич1ого таниги бегьула. Амма нужеца ц1аланаха. Щай? Щай гурелъул гьанибе щвезег1ан гьаб ч1анда бук1ин лъалеб бук1инч1ого!!!
Гьаб хъваялъул г1иллаги бук1ана дир цо суал нужеда дандбай))
Творческий псевдоним абун бук1унаха хъвадарухъабазул. Цо диеги къвариг1ун буго гьеб. Нагагь абун газетазде хъвадаризе байбихьани, мадугьалзабазда сурич1ого вук1инеха)) Дица хъварабни лъач1ого бук1ине. Гьел макъалабазухъ щвезе рук1арал киналго орденалги медалалги, дун хун хадув нилъерго Бахул каранда рае. Гьенир ц1акъ рекъон ккела гьел.
... Нуц1иха жаниве саламги кьун вач1ана Муртазаг1али...
Нагагь абун гьалъулъ даг1ба батани, дида щибго г1айиб гьеч1о. Кинабго г1айиб Муртазаг1алида буго!(г1айиб асде базе бук1ана къот1и)...
Кинаб ц1ардай хъван лъик1 макъалабазда гъоркь?

Бихьулищ цо дунгун цадахъ г1ат1ал хинк1азе патих1а бачунел лъик1а-лъик1ал г1адамал: Х1утниса Шамил (мун а, вац, рокъове, кьижизе заманги щванин), Мух1амад Аварский, Мух1амад Къебедов, Муртазаг1али Мух1амадов( гьасие хинк1го хут1ич1о, киналго Къебедовас квана. Гьавгун хадуб квина, маякалдеги рахъун). Зама-заманлда дирго лъай- хъвалел г1адамазул х1исаб гьабидал, дидаги рак1алде ккола, гьадиг1ан лъик1ал г1адамалгун лъай-хъвай бугев дунги лъик1ав чи ватилин. Амма Шамилица бет1ер к1ибик1ула "абизе бегьич1олъиялъег1оло мунги добго жо бугин"...

Сундул х1акъалъулъ хъвалев дун вук1арав? К1оч1он танин кинабго рек1еде бач1ун бук1араб.
-----------------------------------------------------------------------
Аллагьасда цереги лъик1аллъун гьарегиха.

Категория: Мои статьи | Добавил: weux (09.04.2016)
Просмотров: 182 | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]
Вход на сайт
Балагьизе

Ахмедова Аксират © 2017