Рузман/Пятница, 24.11.2017, 13:53
Ассалам Г1алайкум Гость | RSS

САйт учителя аварского языка Аксират Ахмедовой

Сайталда руго:

Киналниги сайталда руго: 1
Гьобол: 1
Сайталъул г1ахьалчи: 0
Block title

Каталог статей

Главная » Статьи » Мои статьи

Ц1адул балагьалдаса ц1унеги.

Ц1адул балагьалдаса ц1унеги.

26 апрелалда 2016 соналъ къаси саг1ат к1игоялда йорч1ана макьидаса Пат1имат Чупайлова, Агъада школалъул г1урус мац1алъул муг1алим. Йорч1ун т1окъо-къоноялде къват1ие яккидал гьелда бихьана г1емер рик1к1ад гьеч1ого ц1адул кунч1и. Цинги гьелъ бахъинабураб ах1и-х1ураялъ т1аде рахъарал г1адамал рак1арана ц1а ккараб бак1алде. Ц1а ккеялъул г1иллалъун тана къаси бук1араб гьороца Исрапи абулев чиясул бокьоре унел рук1арал токалъул кварал данд кьабг1изари. Гьелдасан рек1ана бокьалда ц1а. Г1адамал рак1арулелдего гьеб гьалаглъана ва аск1об бук1араб Исрапил басрияб минаялда хурхана. Талих1алъ жанив г1адан вук1инч1о, Гьел ц1ияб минаялъуре рахъун рук1ана. Бажарарас бажарараб гьабун ц1а свинабиялда т1ад х1алт1улеб Чоноб колол жамаг1ат бугебг1ан мехалъ т1аде щолел рук1ана цоги кулаздасаги чи. Ц1а свинабиялъул х1аракат г1адада кколеб бук1ана гьороца гьалаг гьабун гьеб. Исрапил минаялдасан гьеб хурхана Манижат абулей херай г1аданалъул минаялда. Чанадерица бокь даг1агьана, Жаниб бук1араб г1ака, к1к1уйца мехтун, къват1ибе бачинего бажарич1о, рагьдухъе щварабго г1одоб ккана ва хвана. Бече хвасар гьабизе к1вана, амма гьод ч1уч1х1ун бук1ана т1аде бокьалъул т1ох ч1унтун бач1ун.
Киса-кирего дагь-дагьккун Агъадисезул жамаг1ат, хабар лъарав щивго гьоркьов теч1ого кумек гьабизеян рач1унел рук1ана.
Чоноб къулг1але щвезе ц1а ккараб бак1алдаса буго нусго метра. Мадиро ч1ана лах1уцаги к1к1уйдуцаги гьурмал ч1ег1ерлъарал г1олохъабаз, Ва байбихьана лъадал ц1ун ведроялъ гьалагаб ц1адуле т1езе лъим нахъ г1унт1изабизе. Хут1арал бел- газагун ракь балел, хет1улел, к1варас квараб гьабулел рук1ана. Ц1а хурхараб рокъоса Манижат къват1ие ячана. Йиха-хочун гьелда кколеб-толеб жого бич1ч1улеб гьеч1оан. 
Цо заманалда рек1еде ятарай Манижатил "Вай дир г1арац!" абулеб ах1и бахъана.Кибалиго къвач1иниб бугин ах1улебги бугоан. Гьалагаб ц1а къват1ибе бурулеб гординисан жаниве к1анц1ун ана Ах1мадханов Гъазибег, 10 классалъул ц1алдохъан. Т1аде ч1унтулеб Т1охги, цадахъго г1адамаз т1олеб лъимги, х1ухьел ц1азе рес гьеч1еб к1к1уйги, гьев ч1аго къват1иве вач1иналда хьулцин бук1инч1о. Руччабаздаса рахъун к1азал гьурмада жемулел рук1ана г1олохъаби гьев къват1иве вахъизе инеян. Амма Гъазибег г1емер заман инелдего кодоб цо къвач1аги ккун добго ц1адул гордухъан къват1иве к1анц1ун вач1ана. Хадуб къвач1а Манижатихъе кьуна. Х1алаб жо гьеч1оан, дагьаб рас бугоан ч1урч1х1ун. Исрапил бащадаб гьумер бух1ун бук1ана, амма щибго унти лъалеб гьеч1ин абулеб бук1ана (болевой шок- мед.)
Кутакалда х1аракат бахъана г1олохъабаз. Кидаго щаклъи бук1инч1о х1ажат ккедал жамаг1ат цоцадае батиялда. Дие ц1акъ бокьула дирго жамаг1ат. Машааллагь!
Амма цо-цо х1айванги кибго камуларо. Гьаб ах1и-х1уралда халкъ бук1аго, цо такъия лъуразул "диналъул вацазул", бичаяс биччани г1адамилан вижунги вугев цояв, вуго довелъги вилълъун какие чурулев. Рух1улел минаби руго, Цоги минабазделъ ц1а инаро х1инкъи буго, х1амул г1адин х1алт1улел васалгун ясал руго. Гьаб цо гьощмук1 какие чурулев вуго.
Какги к1алги налъи буго, лъик1аб иш буго. Амма жужах1алъувдай ккелаан цин жамаг1аталъ гьабураб гьабун гьезда цадахъ ц1адулаб балагьалдаса кололъ ругел хут1арал минаби хъвасар гьариялда т1ад х1алт1ани? Гьел цоги г1олохъабазул цонигиясун как хвеч1о, ц1а свинабизе к1варабго чура-хулунги гьарун бана. Кисебдай къабуллъула? Къуръаналде балагьизе ккела гьениб щиб хъван бугищали.
Къойида жаниб азарго нухъалъ абулаха, Аллагьас ц1унеги г1акълу гьеч1еб бак1алде г1елму щвезеян. Гьаб диналда жанир "показухъаби" лъиг1изе ккани, доб коммунистазул заманаялда г1адин гьукъизе ккола дин! Цинги гьеб унгоги иман бугес жиндиего гьабулеб бук1ина, доб мехалдаго г1адин. "Показушниказда" гьеб цинги хехго ч1алг1уна, ва гьез т1убанго рехун тола. Иман бугелги, бугелин х1алелги данде росун бусурбабиян абуни, бусурбабазул къадар дагьлъила цинги, гьеб гьукъидал, амма хут1арал г1адамазда бихьдае гурел, унгоги иман бук1иналъ дин гьабулел рук1ина.
Цо х1айван сабаблъун, цогидазул бах1арчилъи бихьич1ого бегьиларо. Жидеца бахъараб х1аракаталъухъ ва гьабураб бажариялъухъ 13 соналъ дидаги цадахъ х1алт1арай г1урус мац1алъул муг1алим, жиндир эбел Зулх1ижат К1удиевнаялъ диеги дарсал кьурай, Пат1имат Чупайловалъе, цинги 10 классалъул ц1алдохъан, унго-унгояв маг1арулав Ах1мадханов Гъазибегие, киналго кумекалъу рач1аразе, хабар нахъа лъан хадуб рак1 гурх1аразеги к1удияб баркала кьолеб буго Манижатицаги, цадахъго дицаги(дун бат1ияб кололъа вук1аниги нилъерго жамаг1аталъул чи кколелъул, гьеб нилъер унти ккола).
Ц1адул балагьаздаса ц1унеги Аллагьас, киг1ан мискинаб бук1аниги (Манижатил мискинабги бук1инч1о бат1аго), г1умруялъ данде гьабураб маг1ишат тушбанасулцин гьедин хвезе цо дагьабниги ях1ги иманги бугев чиясе бокьилищха.
Какие чурулеб бук1аразул къокъялда дица метер абила.
Гьаниб Пат1иматилги Гъазибегилги суратги лъезе рекъараб бук1ун батила, суратал рахъиялде рег1арав чи вук1аравани))) Метер школалдаги рахъун лъела. Гьей Пат1иматил х1акъалъулъ меседил макъала хъвазецин лъик1аб бук1инаан, кутакалда йик1а-яхъине лъарай, гьобол хирияй, рак1 разияй г1адан йиго. Росу тирун ц1еханиги, квешни киб гурин, валиг1адай жо йигин гурого лъилниги бат1ияб пикру батиларо. Лъик1ав чиясул баракат камуларо, гьалда бихьун гуребани кьижарал чиги жаниргун чан минадай бух1илаан...
-------
Гьаб дунялалда г1адан вук1уна к1иго бат1ияб тайпаялъул:
1. Берцинго абун бич1ч1улевги,
2. Гьурмалъ зарги кьабун абуни гурони бич1ч1уларевги.
-----
Манижатил г1агарлъи щвана шагьаралдаса гьей жидехъего ячинеян. Чанадерил бихьинал-ц1уял рищич1ого киналго цере эхетана, жидеца кьолила гьелъул жаваб, гьаний жидеда цее йик1ине ккелила гьейин. Гьебги кколаха жамаг1аталъул цолъи бихьизабулеб г1аламат. Гьеб хабаралда гьоркьосанги цо-цо "какие чурулелги" камич1о. Амма азарго лъик1асда гъорлъ к1игогун бащдав г1абдал вугин абун росу квешлъиларо. Гьел г1абдалзаби киналго росабалъ рук1уна. Гьел ц1ик1к1унгеги, цо-цо дирги дунг1адинасулги ццин бахъинабизе камизеги камугеги. Х1ут1араб жамаг1ат машааллагь.

Категория: Мои статьи | Добавил: weux (01.05.2016)
Просмотров: 123 | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]
Вход на сайт
Балагьизе

Ахмедова Аксират © 2017